一花一世界（上）
我叫阿花，係一個村姑。
我一直以為，我會嫁畀一個農夫，生幾個仔女，從此男耕女織，平平淡淡咁生活落去。
但災難，永遠都係意料之外。
一年內，水災陸續發生喺唔同嘅地方。
好多親友都死咗，我僥倖活下來，亦流離失所，跟住一班災民，一齊前往首都，希望有啖粥食。
但首都嘅情況都好差，我好不容易領到賑災嘅粥水……幾乎只有水，而冇粥。
我坐埋一邊，將呢碗水吞落肚，努力品嘗當中殘存嘅粥味。
點解個天要咁對我哋？
呢個時候，一隊士兵捉走咗我。
我冇掙扎，甚至有啲期待，唔通佢哋以為我係罪犯，要坐我去坐監？監獄係咪有飯食？
士兵將我帶到皇宮，去到一個白髮老人面前：「大祭師，呢個就係您要嘅女人。」
佢居然係大祭師，傳說大祭師法力通神，最受國王信任。
我連忙跪地叩頭：「你係大祭師，求你救吓大家，大家冇嘢食，好餓，出面仲喺咁落雨，浸爛晒啲農作物……」
大祭師畀咗碗粥我食，然後目光灼灼咁望住我：「我救唔到大家，對唔住。但你，可以拯救呢個世界。」
我？一個咩都唔識嘅村姑？
「我捏指一算，我哋嘅災難，係來自另一個世界。」
大祭師好嚴肅咁講：「我會以生命為代價，施展神術，將你送去嗰個世界。只有你嘅命格，可以承受神術，你係我哋唯一嘅希望。」
我好迷茫：「咁我要點做？」
大祭師苦笑：「我只算出一句話：『一花一世界』。」
我手足無措，但我諗起被洪水淹沒嘅親人、一路上餓死嘅災民……
滿腔熱血湧上心頭，我大叫：「就算連條命都唔要，我都會盡力㗎！」
大祭師全身化為碎粉，一陣白光湧入我嘅身體，我覺得自己變得愈嚟愈大，跟住就暈咗。
「小姐，你冇事丫嘛？」一個奇裝異服嘅女人叫醒我。
我從地上爬起，四周嘅環境好陌生，我唔理得咁多，即刻問個女人：「請問，你知唔知咩叫『一花一世界』？」
「唔知喎，上網查吓囉。」女人拎出一部奇怪嘅發光物體，撳咗幾吓，遞畀我睇。
上面密密麻麻全部都係字，我根本唔多認得，唉，以前做開村姑，唔識字㗎嘛。
睇嚟拯救世界冇咁簡單，我都係冷靜啲，慢慢嚟。
我冇呢個世界嘅身份證明，我只可以搵一間偏遠嘅餐廳，做一個洗碗工。
據講，由於我係黑工，我嘅人工係低過「最低工資」，不過呢度包食包住，我都冇乜怨言。
我甚至覺得，依加嘅生活，比以前好好多。
唔好話饑荒嗰陣，就算以前咩事都冇，我都要幫手耕田，洗碗點都冇耕田咁辛苦。
仲有，以前過年先有肉食，依加幾乎日日有得食，夏天有冷氣，冬天有暖氣，總之就爽啦。
不過，我唔係嚟享受嘅，我係嚟拯救我嘅世界。
所以，所有業餘時間，我都用嚟學習呢個世界嘅規律同文字，反正冇身份證，我都好難周圍去。
我發現，「一花一世界」除咗係一句佛家嘅說話外，仲係一個新嘅研究項目，主導者係名滿天下嘅葉博士。
而我嚟到呢個世界，醒番嘅地方，就喺葉博士嘅實驗室附近。
我個世界嘅災難，好可能就係由呢個研究項目而來。
餐廳嘅大廚阿達好熱心，有咩唔識都會教我，我唔肯講我嘅來歷，佢都冇逼問我。
我搵到呢啲資料，阿達都幫咗我好多。
後來，我同阿達開始拍拖。
其實我都糾結咗好耐，但呢度我冇親人、冇朋友，真係好寂寞，而且阿達對我好好，佢應承我，無論我想做咩，佢都會同我一齊努力。
我相信，我會拯救到我嘅世界，然後同阿達幸福快樂咁生活落去。
我嘗試搵葉博士，無論係Send Email、寄信定用社交媒體，都猶如石沉大海。
我想去佢個實驗室，但喺門口就被保安攔住，根本入唔到去。
我同阿達請咗幾日假，喺門口附近等，等咗幾日，終於等到葉博士。
「葉博士，我有啲嘢想請教你。」我大叫，葉博士恍若未聞。
我再叫：「我係……一花一世界！」
葉博士終於停低望向我，我連忙將我嘅經歷講晒出嚟，由村姑、災難到大祭師嘅法術。
阿達聽到目瞪口呆，葉博士就雙眼發光，帶埋我哋去佢嘅實驗室。
實驗室有好多朵花，葉博士話：「呢度，就係『一花一世界』，亦係你嘅世界。」
我完全唔明，葉博士解釋，佢嘅研究項目，係喺植物上培育生物。
估唔到，有一種花上面產生咗有靈智嘅生命體，呢啲生命體自己進化、發展，開始有自己嘅制度同文明。
葉博士就大肆培育呢種花，整咗好多個花中世界，而我嘅世界就係其中一個。
葉博士遞咗一副特製嘅眼鏡畀我，我仔細睇其中一朵花，花上有忙碌嘅人群，有櫛次鱗比嘅房屋，真係好似一個完整嘅世界。
知道自己只係一朵花上嘅微型人，一時間，我係有啲難接受。
但我更關注嘅係：「點解我個世界會咁多災多難？」
「我將其中一組設定為『災難組』，測試『一花一世界』對災難嘅反應。」
葉博士好滿意咁望住我：「哈哈，人嘅潛力真係無限嘅，居然有個世界發展出咁奇妙嘅法術，將你放大、送出嚟。」
我忍唔住問：「如果我係來自花世界，點解我醒嗰陣，唔係喺實驗室內？」
「我暫時未知，可能係你個大祭師驚你變大後，直接壓爛朵花，所以將你送遠啲掛。」葉博士一路講，一路觀察「災難組」嘅花。
待續...
將專頁設定為「搶先看」/ "See first"，最新故仔馬上睇！
動物傳心師凶殺案：https://goo.gl/qcCGYz
宿命殺手：http://bit.do/eTYpC
#短故 #短篇 #小說 #陳美濤 #廣東話 #粵語 #tomatochan #一花一世界
Search